Michelle

Niżżerżaq niġbor l-aħħar qtar tal-assenza
li ħallejt impittra mal-liżar safi benniena.
Inkebbeb żewġ xagħriet mal-qamar imdellel,
nikteb kapitlu ieħor bla ma nispiċċah.

Inxomm ir-riħa ta' fjurtek imwelled minn ġufek verġni,
nixxennaq għal millisekonda oħra
biex induq tjubitek mhix spjegata.

Nistenna, nistenna, is-sema jiċċarrat,
nistenna, nistenna, il-baħħ jimtela.

Erġ' ejja lura,
it-tieqa mbexxqa,
il-liżar ma ħsiltux. (C)

Itturufnat

Jien iswed faħma, klandestin imġiddem,
għarbi nkallat, terrorist minn ġuf ommi.
Niġbor għeruq imdemmija ta' nies bla wiċċ,
mill-baħar-qabar li jibla' 'l ħuti b'kapriċċ.

L-abjad sammarli l-musmar imsaddad tad-destin,
jikkoreġini fil-ħażen injorant tiegħi.
Għandu qalbu tajba w umli,
jitlob għalija biex nipprogressa w neduka l-ġensi.

Illum fuq il-qoxra mbandla tal-patibolu
niktiblu din l-ittra ta' ringrazzjament:
Grazzi talli dejjem tgħallimni
għax mingħajrek ma jien xejn. (C)